Little Big Hero…
Euse chli gross Held isch hüt Nacht igschlafe für immer… Aber nöd ohni es letschts Mal z’zeige wie tough und kämperisch er isch! I de Nacht hät sich sin Zuestand starch verschlächtered, er hät extrem müeh mit de Sättigung übercho und sie händ ihm en Muskelentspanner müesse gä, so händs sini Atmig wieder chli in Griff becho. Sin Körper häts sich aber immer meh übersüred. Er hät s CO2 nüme chöne wegschnufe und so händs ihm au kei Bicarb meh chöne gä zum gägestüre. Es isch e langi intensivi Nacht gsi. De Attending isch dä zu eus cho, er hegi mitem wohl grösste Ventilator Spezialischt vo de Wält gredet, ob er e Idee hät wiemer de Liam no besser chöng unterstütze aber er hegi au nöd chöne hälfe. De Liam isch zu dem Zitpunkt uf sehr höche Settings gsi, heisst sie händ scho miteme extrem höche Druck i sini Lunge blase aber es isch immerno zwenig gsi, zum am Liam gnueg zhälfe s CO2 wegzschnufe.
Er hät dä gseit, de Liam ligi im sterbe und es gäb nüt woner degäge mache chöngi. Sin Körper gäbi uf und stelli langsam ab. Am Liam sin Bluetdruck isch sit langem wiedermal guet gsi und sini Sättigung isch eigentli au aständig gsi, sini Herzfrequenz isch langsam aber stetig am sinke gsi. Vo über 100 bis uf 69. De Liam hät sich aber nomal zrug kämpft und sini Herzfrequenz isch wieder bis uf 100 ufe au susch sind sini Vitalwert guet gsi, einzig sis pH isch immerno sehr tüf gsi. Es isch es letschts ufbäume gsi, mer hät s Gfühl gha, eifach nomal zum zeige wie starch er isch. De Attending isch sich bi eus go entschuldige, de Liam heg sich da zrugkämpft und es gsehch us als wür sin Körper nonig ufgäh. E Nurse hät em Liam no e Karton Box baschtled, druf isch sini Buggy mit sine Tierli, de Bus vo “Wheels on the bus”, d Sterne vo “Twinkle Twinkle Little Star” und sin Name. Sie hät de Buggy ufeme Foti gseh wo a de Türe hanged.
De Liam hät sich guet ghebed bis am Abig und eus nomal Hoffning gä, nöd nur eus, diversi Ärzt sind verbi cho und händ gseit sie heged no nie so e starchs Chind gseh. Er hät eus hüt all nomal positiv überrascht.
Leider isch am Abig sin Zuestand immer schlächter worde und sis pH hät sich nüm erholt. Sin Bluetdruck isch au am sinke gsi und mer hät en au mit meh Medikament nüme stabil chöne bhalte.
De Liam isch nach Mitternacht also am 06.05., nacheme riese Kampf, uf de Tag 1 1/2 Jahr nach sinere Diagnose, für immer igschlafe. Er hät sin letschte Kampf gwunne, will de Chräbs isch weg gsi im Bluet und bi so vielne Car-T Zells wohl au susch. Er hät au i sine schwerste Zite immer no es Lächle uf de Lippe gha und so blibt er eus au in Erinnerig.
Guet Nacht Liam…
Liebä herzigä big hero Liam.
Du bisch Hei gangä. Häsch die Wält verla, bisch erlöst wordä vo allne Schlüch und Schmerzä.
Mir händ dörfä a dim läbä teilneh und sind unglaublich trurig.
Du bisch einfach es riesigs Vorbild für eus alli.
Liebe Tiffany und lieber Thomas
ihr händ alles gmacht für eure little big hero.
Es tuet eus so leid, mit sind mit euch.
Herzlichi Anteilnahm.
Barbara & Peter
Euse little big hero
jetzt bisch du ufem wäg in ä anderi wält ohni schlüch und schmärze. Mir hei di in de letschte mönet dörfe begleite und sin in gedanke immer bi dir gsi. Es isch unglaublich wie tapfer du und dini liebe eltere dis schicksal treit hei. Mir hei immer wieder gstunt wie stark dir alli sit und wie du „euse kline grosse held“ kämpfsch und dis liebe Mami und Papi mit dir. Eusi gedanke si au jetzt bi dir und bi euch liebi tiffany und liebe thomas. Mir wüsse, dass es keini wort git wo jetzt richtig wäre aber mir hoffe, dass eusi gedanke euch ä chli kraft gäbe. Mir si unglaublich trurig und si ganz fescht bi euch 😘 Corinne, Christoph, Lena und Tessa
Ihr liebe, mir sin unendlich trurig und es tuet eus allne wahnsinnig leid. In Gedanken sin mir bin euch und hoffe, dass das chli Kraft git für die schweri Zit wo jetzt chunnt. Liam mir wünsche dir ä gueti reis..du bliebsch immer in euse härze und bisch euse chlini big hero.. mit sooo viel Kraft und Kampfgeist wo mir eus alli es schiebli abschniede chönne…ihr händ so tapfer mitkämpft und alles erdänklig mögliche gmacht.. mir sind bin euch..LG denise, martin, ben und elle
Liebi Tiffany, liebe Thomas
Mir sind so sehr trurig und findet kei Wort! Dä Liam hat bis z letscht kämpft und
ihr mit ihm! Ihr händ d Hoffnig nie ufge und jede Tag mit vill Chraft gmeischtered. Au wänn er dä letschti Kampf verlore hät, simmer tüf beidruckt vom Liam und eui zwei. Jede Tag simer im Blog gsi und händ mit eui ghofft und banged.
Jetzt muss dä Liam kei Schmerze me ha und die ville Schlüch machen ihm au kei Angscht me!
Mir sind mit euise Gedanke bi eui und em Liam und wünsched eui vill Chraft i dere schwere Ziit!
Grossi Umarmig
Joly und Peter
Ihr liebe und unendlichst tapfere Hero-Mami und Papi
Mir chönds ned glaube, läset die Wort immer und immer wider, hoffet innigst das mer das unfassbari plötzlich innere andere reihefolg chöntli lese, sooo das oppis guets drus entstoht…. es happy end, das mir am Liam und Euch sooo, sooo fest, vo ganzem Herze gwünscht hättet!
Lebe isch so brutal, gemein, trurig und unfair! De Liam het soo en wundervolle, liebevolle, herzliche en grossartige platz bi euch cha, wahri Hero-Eltere!
Es lebelang, für immer hettet ihr welle euche Goldschatz durs Lebe begleite, unfassbar das ihr ihn jetzt hend muesse Flüge loh….
Er hett kämpf und wie er kämpft hät, en wahre Hero, grosse respekt und hochachtig vo dir Liam, es vorbild bisch und wirsch immer bliebe!
Spann dini Flügel ganz wiit uf, Flüg i e anderi Welt, wo au immer die isch, i de Herze wirsch immer bliebe und sicher au ganz nöch!
In grosser Verbundeheit und Ateilnahm
Yara, Joel, Cataleya
Flo und Steffi
Liebe Trauerfamilie
Eine Stimme, die uns vertraut war, schweigt.
Ein Mensch, der der immer für uns da war, ist nicht mehr.
Was bleibt, sind dankbare Erinnerungen,
die uns niemand nehmen kann.
Unser Aufrichtiges Beileid.
LITTLE BIG HERO I MISS YOUUUUUUUUUUUUUUUU 🙁
Lieber Gruss
Laura, Francesco, Syria & Tony <3
Lieber Thomas, liebe Tiffany
Es tut mir so sehr leid für Euch und Euren kleinen Helden. Ihr seid alle so stark gewesen und Euer Liam hat so tapfer gekämpft, und am Ende musstet Ihr ihn doch ziehen lassen… Ich bin sicher, er hat’s gut dort, wo er jetzt ist.
Ich wünsche euch ganz viel Kraft in dieser schweren Zeit, und dass ihr immer wisst, ihr habt alles in Eurer Macht stehende gemacht. Liam wird es euch von seinem Platz im Himmel immer danken…
Liebi Tiffany, liebä Thomas
Mit tüüfer Betroffeheit und grossem Mitgfühl bekunded mir euses Bileid! Dä chli gross tapferi Ängel isch jetzt amene bessere Ort und wird für immer über eu wache! Mir wünsched eu viel Chraft und Muet und sind für eu da, wänn immer ihr eus bruuched!
Big hug
Andrea und Sämi Burkhard