Christmas and Happy New Year…
Hüt isch Drükönigstag, hüt vor zwei Jahr hät de Liam dä im Kispi verbracht, natürli als König. 🙂 Es isch hüt au scho ganzi acht Mönet her, dass de Liam für immer igschlafe isch. Wiehnachtszit isch sicher kei eifachi gsi.
Sit em letschte Post isch einiges los gsi. Am 23.12.18 isch euse Online-Shop uf www.beahero.ch live gange. In zämearbet mit Robeaux Fashion, wo langjährigi Erfahrig im Fashion bereich hät, hämer euse Little Big Hero Pulli entworfe. De ganzi Gwünn womer mit dene Artikel erzieled, gaht id Stiftig. A dere Stell au viele Dank a alli wo scho en Pulli kauft händ und en Teil vo de #BeAHero worde Familie sind.
Zuesätzlich hämer mit de Hậu, enere Kollegin vo eus, zämegspannt. Sie stellt handgmachti Armchetteli her und spändet de Gwünn vo de Little Big Hero Kollektion a eusi Stiftig. Bstelle chamer sie über le_phuchau91@outlook.com oder uf ihrem Instagram Account @beads_bracelet_.
Am 24.12. hämer dä höche Bsuech us Seattle becho. Matt und Katie, womer am 24.12.17 händ döfe kännelerne, sind eus i de Schwiiz go bsueche. Mir händ also quasi euses Friendaversary gfiired. Sie händ voreme Jahr am Liam ganz viel Gschänkli bracht, obwohls weder eus no de Liam kännt händ, d Verbindig isch über de Katie ihri Eltere und mini Eltere hergstellt worde. Sie händ eus über die ganz Zit in Seattle stets unterstützt und eus immer wieder im Spital bsuecht. Übers letschte Jahr sind sie also sehr ängi Fründe vo eus worde.
Heiligabend isch kein eifache Tag gsi für eus, die 1. Wiehnachte ohni Liam, es isch schön gsi öpper vo Seattle bi eus zha. Letscht Jahr hämer no so schön zäme gfiired und de Liam isch richtig guet druf gsi und happy.
Er hät damals au im Children’s es Gschänkli übercho, jedes Chind wo a Wiehnachte hät müesse is Spital oder wo stationär gsi isch, hät es Wiehnachtsgschänkli übercho. Das hät eus dä au dezue bewegt, dass id Schwiiz zbringe und de Kinder im Kispi au e Freud a Wiehnachte zmache. Dank de viele grosszügige Gschänklispende, wiemer ja im letschte Post gseh hät, hämer de zwei Autos voll Gschänkli is Kispi chöne bringe. Mir wänd allne wo sich da beteiligt händ, nomal vo Herze danke!
Pünktlich am 10:30 Uhr simer vom Clown Dr. Dada, wo Teil vom Pilotprojekt Spitalclowns isch, in Empfang gno worde. Er hät de Matt, d Katie und eus zwei bim Verteile unterstützt.
Agfange hämer mitem verteile ufem Notfall, damals au euse erst Kontakt mitem Kispi gsi im November 2016. Döt hämer eusi Stofftierli chöne verteile und döt la für zuekünftigi Patiente und no für d Intensivstation, will uf vielne andere Statione döfeds us hygienische Gründ kei Stofftierli aneh.
De Dr. Dada hät döt dä es Wiedersehe gha mitere Patientin wo er guet kännt, er hät eus dä au no gad en Iblick i sin Altag gä und eus ganz e schöni Gschicht verzellt.
Er hät über die letschte Mönet es Meitli döfe begleite, wo e Organtransplantation vor sich gha hät, im ganze Prozess hät sie immer mal wieder e Narkose brucht. Sie hät aber immer furchtbar Angst gha devor und es isch jewils für alli e grossi Herusforderig gsi. Mitem Dr. Dada händs dä aber es Ritual chöne ifüehre, wonere d Angst gno hät. Es isch es Zämespiel zwüsche Patientin, Eltere, Pflegerinne, Ärzt und Clown. Wos dä sowit gsi isch und das Meitli ihri neu Niere übercho hät und sie für das is Unispital hät müesse, isch ihri Bedingig gsi, dass de Dr. Dada debi isch. S Pilotprojekt vo de Spitalclowns hät das möglich gmacht und es isch für all viel weniger stressig gsi und alles super über Bühni gange. Mittlerwile isch sie sogar sowit, dass sie gar kei Angst meh hät und sie d Untersüech au ohni de Dr. Dada guet durestaht. Das hät eus zeigt, das mir ganz e tolls und wichtigs Projekt unterstützed.
Mit allne Gschänkli ischs dä ufem Liam sini Station gange, s PSB.
Döt simer mit offene Arme empfange worde und mir händ eus dä mal usbreitet. De Dr. Dada isch dä zu de Patiente id Zimmer go d Gschänkli verteile, da er d Chind scho kännt hät, hät er au gwüsst was ihne gfallt und mir händ ihm am Alter entsprechend öppis usegsuecht. Es hät dä glich no es Stofftierli döfe si, sind ja all neu gsi.
Nachem PSB ischs dä ufs SZT gange, wo de Liam au viel Zit verbracht hät i sinere chline Box.
Wills ufem SZT halt nöd anderscht gaht, hämer dä sogar d Reaktione vo de Chinder döfe gseh. Wieder en Bewies, dass mer s richtige mached und es isch richtig schön gsi, die Chinder strahle zgseh. D Chind, wie au d Eltere sind zerscht gar nöd rächt drus cho was da jetzt gad passiert.
Die nächst Station, isch e witeri gsi, wo mir scho kännt händ, will de Liam au uf dere gsi isch. Mir sind zwei Stöck tüfer ufs PSU. Ufem wäg abe, hät de Dr. Dada au de Matt richtig zum strahle bracht, mit Seifeblöterli. 🙂
De Zuefall häts welle, dass am Liam sini damalig Pflegerin eus herzlich in Empfang gno hät ufem PSU. Mir händ döt nöd nur de Chind wo gad döt gsi sind chöne Gschänkli verteile, sondern händ ihri Spielsammlig uf de Station gad no chli chöne uffrüsche. S schöne isch gsi, dass mir für jedes Alter öppis lässigs gha händ und vorallem au Sache womer im Spital guet cha bruche wie zum Bispiel am Liam sin Favorit Chnätti oder au Spieli, Bäbis, Puzzles, alles wos Herz begehrt.
Mit scho bizeli weniger im Schlepptau, simer dä ufs PSA. Döt isch sich dä es Mami go bedanke und hät eus no verzellt, dass wo ihre Vater chürzlich gstorbe isch, er nöd Bluemespände hät welle, sondern dass mer a eusi Stiftig spänded! E wunderschöni Geste. D Gschänkli sind immer sorgfältig usgsuecht worde.
De nächsti Stopp isch dä uf de Chirurgie im F gsi, eine vo de wenige Statione wo de Liam nie gsi isch. Sie händ sich döt richtig müeh gäh mitem Wiehnachtsbaum.
Und willmer obe agfange händ, isch nachem F s E cho. E eus au bekannti Station. Döt hämer Ostere 2017 verbracht, nachdem de Liam i de Nacht Fieber becho hät und mir dä uf de Notfall händ müesse. Untercho simer damals im sogenannte “Chämmerli”. 🙂 Eusere Lune hät das aber nöd gschadet. De Liam hät döt die ganz Zit nachem Häsi gsuecht.
Zrugg zu de Gschänkli, mir händ immerno einigi gha. D Freud isch nöd nur bi de Chind gross gsi, sondern jewils au bi de Pflegerinne. Ufem E hämer dä au e Pflegerin atroffe, wo früehner ufem PSB gsi isch, sind immer wieder schöni Begägnige. Je länger mir unterwägs gsi sind, um so meh hätmer gmerkt wie wichtig de Dr. Dada scho worde isch im Spital. Es isch immer wieder nach ihm gfröget worde und öber ächt spöter nomal chöngi verbi cho bi de Chind. Es isch idrücklich gsi ihm bi de Arbet zuezluege und wie toll er das macht, er schafft mittlerwile au scho 19 Jahr als Clown i Spitäler. Au de Liam hät ja jewils immer e riese Freud gha, wänn d Clowns vo de Theodora Stiftig jewils am Dunnstig cho sind, meistens d Pirolina und de Dr. Professore.
De Schluss hät dä d Station im D gmacht. Die händ au unbedingt wiedermal neui Spieli für ihre Spielschrank brucht. Chind händs i allne Altersklasse gha, vom Baby bis zum Teenager. De Matt isch jewils immer als Photograph parat gstande. Schön isch natürli gsi, wänn d Eltere sich jewils go bedanke cho sind. Das all au gwüsst händ, dass d Gschänkli am Liam z verdanke händ, häts immer no es Chärtli dezue gä.
Nach guet 3 Stund simmer uf allne Statione gsi und händ immer no Gschänkli gha, die hät de Dr. Dada zu sich gno und die über die nachfolgende Täg und a Silväster verteilt.
Für eus isch de Tag au es riese Gschänk gsi, will de Liam witerhin vielne Chind und Familie, inere ganz schwierige Zit, es Lächle ufs Gsicht zaubere hät chöne. Immer wieder hämer vo Pflägende ghört, dass sie am Liam sini Gschicht känned und mitverfolgt händ. Euse Little Big Hero macht immer no das woner am beste cha, anderne e Freud bereite und eim Muet mache und es isch erscht de Afang gsi!